memorable MaLanjKhand

hum me se kitane hi log malanjkhand me rahe aur wahan se alwida kah kar chale gaye sada ke liye; par malanjkhand unme se kisi ko bhi nahi bhula. haan log badal chuke hai par zamin aaj bhi wahi hai. itane log to hai wahan ki aaj bhi laut kar jana chahe to bahut se pahchanwale mil hi jayenge. par hum me se adhikansh ko fursat hi nahi. zara yaad karo koi ped yaad aata hai; aap to chale gaye par wo ped aaj bhi wahin hai, aur jyada to kuch nahi gaya us ped ka par jab aap wahan the to aapki wajah se kabhi na kabhi uske kuch patte zarur tut gaye the; aakhir wo ped bhi zinda hai kam se kam un tute patton ke nate hi ek baar palat kar aane ka kast karna kisi ko khushi ho ya na ho par us ped ko zarur achcha lagega aapse mil kar.Kyunki aapki sanse unhi pattton ki karzdaar hai.

ye to bas ek ped ki misal hai insaan bhi kuch aise hi hote hai kuch bhul jate hai kuch sirf yadon me jite hai.hum me se kuch aise bhi honge jo wahan paida hue hai par kai salon se use palat kar bhi nahi dekha; wo zamin yaad karti hai bahut, kyunki us zamin par aapke nanhe kadam kabhi chale the; kabhi aapne kisi ke nanhe kadmon ko chalna sikhaya tha. us zamin se aaj aap log chal kar itani door ja chuke hai ki kabhi dubara palat kar dekhane ki bhi kosis nahi ki.

khair malanjkhand ko aadat ho chuki hai tanha jine ki; ek ajib sa sannata chaya hai wahan. main nahi kahta ki sab chode aao, par ek baar aa kar ke apni jo yaaden wahan aap log chod aaye the use wapas le jao. taki wo ped aur wo zamin intazar me to na jiyen. bas itana hi kahna tha.

Nitin "Ni3" Parihar {raja}